Бөлүмдөр
Дүйшөмбү, 19-август
Баткен облусу, Айдаркен 28.05.2019 17:51

Жаш талант: Айдаркендик А.Токторалиев келечекте атактуу сүрөтчү болуунун камын көрүп жатат (сүрөт)

Turmush -  Айдаркен шаарынын 16 жаштагы тургуну Анас Токторалиев сүрөтчүлүк өнөрүн такшалтууда. Аймактык кабарчы аны менен таанышты.

Өзүнүн айтымында, учурда көркөм сүрөт мектебинде 9-класста окуп жатат.

«Мектепке чейинки курагымда сүрөт тартууга болгон кызыгуумду эстей албайм. Балалыкты ойноп жүрүп өткөрдүм. Мектепке бара баштаганда сүрөт тартууга болгон кызыгуум жандана баштады. Бул убакка чейин колума калем кармап көрбөгөн жаным, калем кармап, китептеги сүрөттөрдүн баарын кагаз бетине тарта баштадым. Акырындык менен сүрөт тартууга болгон кызыгуум ойгонуп, келечекте мыкты сүрөтчү, скульптор болом деген максат койдум. Тарткан сүрөттөрүм менен бир катар сынактардын жеңүүчүсү болгом. Кийин Баткен шаарында атайын сүрөт тартууга шыгы бар балдарды окутуучу мектеп-интернат бар экендигин угуп, ата-энемден уруксат сурап, бул жакка келгем. Учурда 9-класста окуп жатам.

Кыргызстанга, дүйнө элине белгилүү сүрөтчү, скульптор болгум келет. Ал үчүн бүгүнкү күндө талыкпастан ар бир агайдын айткан кеп-кеңештерин угуп, аракет кылып, сүрөт тартуунун, айкелдерди жасоонун сырларын өздөштүрүп жатам. Мен үчүн табияттын ар бир көз ирмемин кагаз бетине түшүрүү ырахат тартуулайт. Кээ бир күндөрү түнү менен сүрөт тарткан күндөрүм болот. Анын ичинде жакшысы жана жан дүйнөмө жакпаганы болуп калат. Аларды эч кимге көрсөтпөй тытып салам», - деди ал.

Сүрөтчү жигит үй-бүлөнүн тун баласы.

«Үй-бүлөбүздө 4 бир тууганбыз. Үйдүн эң чоңу болгондуктанбы калемди колума кеч алдым. Анткени менден улуу эжем же акем болуп, алар мектепке барышканда мен да аларды көрүп, калем менен эрте таанышмакмын деп калам. Менден башка бир туугандарым сүрөт тартышпайт», - деди Анас.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×