Бөлүмдөр
Шаршемби, 13-ноябрь
Баткен облусуБаткен району 29.10.2019 12:00 На русском

5 кызы бар: Баткендик ишкер Асылбек Каримов Тажикстандагы базарга кеткен боюнча дайынсыз болууда. Сүрөт

Turmush -  Баткен районунун Ак-Сай айыл өкмөтүнө караштуу Таш-Тумшук айылынын 1985-жылы туулган тургуну Асылбек Каримов 5 күндөн бери дайынсыз. Бул тууралуу Turmush басылмасынын аймактык кабарчысына билдиришкен.

Анын бир тууган агасы Абдисамат Каримовдун айтымында, иниси Асылбек Каримов 24-октябрь күнү саат 10:00 чамасында Тажикстандын Чарко айылындагы базарга азык-түлүк сатып алууга кеткен.

«Жумуш жоктугунан үй-бүлө багуу үчүн 2 контейнерди дүкөн кылып ачып, 3 бир тууган соода-сатык кылабыз. Буга чейин тажик кошуналар үйгө картошка, пияз, сабиз алып чыгып берчү. Ошол күнү иним сабиз, пияздын баасын көрөйүн деп «Чарко» базарына жалгыз кеткен. Базарда жүрсө эле жөнөкөй кийим кийген адамдар алып кеткенин Орозбай жана Акмалхан деген кошуналар көрүптүр. Мына 5 күн болду, инибизден бир да дайын жок. Эгер тажиктердин укук коргоо органдары кармаса, кайсы жерде кармап турушканын да эч ким билбейт. Баткен облустук ички иштер башкармалыгына,
Баткен районунун акими Каламбек Маркаевге, облус башчысы Акрам Мадумаровго жана анын орун басары Кеңеш Салиховго кайрылдык», - деди ал.

Асылбек Каримовдун жеңеси Тайвахан Каримова кайын инисинин кайсы жерде экенин билип берүү үчүн бийлик өкүлдөрүнө кайрылышканын айтты.

Эжеси Хамида Каримованын айтымында, инисинин 5 кызы бар.

«Биз өзүбүз 10 бир тууганбыз. Инимдин 5 кызы бар. Биз Баткендеги бийликке кайрылганыбыз менен эч бир жыйынтык чыкпай жатат. Бүгүн өкүлчүлүктөн 2 адам, менин иним болуп үчөө Тажикстанга издеп кетишти. Бизге «Тажикстандын Исфара районунда экен» дешкен. Исфара районуна барса ал жакта эмес экен. Вице-премьер-министр Жеңиш Разаковго да телефон аркылуу байланышып, инибизди кайсы жерде кармап турганын билип берүүнү сурандык. Бүгүн чалсак телефонун алган жок. Биз өлкө башчыбыз Сооронбай Шариповичтен суранабыз, бизге инибиз боюнча маалымат алууга жардам бериңиз», - деди ал.

Облус жетекчисинин орун басары Кеңеш Салихов тажик тараптан так маалымат болбой жатканын айтты.

«Биз бул боюнча Тажикстандын бийлик өкүлдөрүнө кайрылганыбызда алар так маалымат билбей жаткандыгын айтты. Ал эми бүгүн жетекчиликтин кызматкери менен Асылбек Каримовдун бир тууганын Тажикстанга жөнөттүк. Биз өзүбүз да тажик тарап менен сүйлөшүүгө аракет кылып, иштин чоо-жайын иликтеп жатабыз», - деди ал.

Ишкер табылды:

1-ноябрда Асылбек Каримовдун туугандары ал аман-эсен табылып, үйүнө келгендигин билдиришти.

Маалыматка караганда, аны Мамлекеттик чек ара кызматынын өкүлдөрү түнкү саат 1:00 чамасында алып келишти.

Баткен облусунун жетекчисинин орун басары Кеңеш Салихов ишкерди тажикстандык күч түзүмдөрү Кыргызстандын чек арачыларына өткөрүп бергендигин билдирди. Алар ишкерди чек ара тозотунан өткөрүп алып, үйүнө жеткирип келишти.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×