Бөлүмдөр
Шейшемби, 12-ноябрь
Баткен облусуБаткен району 19.10.2019 17:08 На русском

Баткендиктер чек арадагы жолдон тажик тараптын мыйзамсыз тосмосун алууну талап кылып жатат. Видео

Turmush -  Баткен районунун Ак-Сай айыл өкмөтүнүн Жака-Өрүк тилкесиндеги чек арадагы жолго тажик тарап куруп койгон тосмону алуу талабы коюлуп жатат. Бул тууралуу өздүк булактар билдиришти.

Маалыматка караганда, тажик тарап аталган тосмону каршылыктарга карабай 2 күн мурда жасаган. Бүгүн кыргыз тарап алардын ишин токтотууну талап кылышты.

«Саат 14:30 чамасында Орто-Боз, Ак-Татыр айылдарынын тургундары чек арадагы Жака-Өрүк аймагында 4 көчөнүн кесилишинде тажик тарап жасаган «лежачий полицейскийди» өз алдынча бузабыз деп келишиптир. Айыл өкмөттү чакыралы деп, айыл өкмөт келди. Сүйлөшүү жүрүп жатат. Элдин дагы бир талабы — чоңдор келип, маселени чечсин деп жатышат», - деп айтылат маалыматта.

Учурда аталган тосмону алдыруу боюнча эки тараптуу сүйлөшүүлөр жүрүп жатат.

Видео жана сүрөттөр тажик тарап жолго тосмо курган күнү тартылган

3 күн мурдагы жолугушуу:

Буга чейин 16-октябрда Баткен шаарында Кыргызстандын вице-премьер-министри Жеңиш Разаков менен Тажикстандын премьер-министринин орун басары Азим Иброхимдин, кыргыз-тажик мамлекеттик чек араны делимитациялоо жана демаркациялоо боюнча эки тараптын өкмөттүк делегацияларынын топографиялык жана укук иштери боюнча жумушчу топторунун кезектеги жолугушуусу өткөн.

Маалыматка караганда, алар президент Сооронбай Жээнбеков менен Эмомали Рахмондун 2019-жылдын 11-октябрында Ашхабад шаарындагы макулдашуусунун алкагында жолугушкан. Анда кыргыз-тажик мамлекеттик чек арасынын калган тилкелериндеги долбоордук сызыкты чийүүнү активдештирүү боюнча ар тараптуу пикир алмашуу жүргөн. Делегациялардын жетекчилери эки өлкөнүн чек ара аймактарында ишке кирген топографиялык жана укуктук маселелер боюнча туруктуу аракеттеги жумушчу топтун алкагында иш жүргүзүү боюнча конкреттүү тапшырмаларды беришкен болчу.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×