Бөлүмдөр
Дүйшөмбү, 19-август
Баткен облусуБаткен району 24.07.2019 08:15

Кыргыз-тажик чек арасындагы абал: Эки өлкөнүн ички иштер министрлери жолугушту

Turmush -  Кыргыз-тажик мамлекеттик чек арасындагы абал салыштырмалуу туруктуу. Бул тууралуу Кыргыз Республикасынын Чек ара кызматынын басма сөз кызматы билдирди.

Кечээ, 23-июль күнү Баткен районунун Дача тилкесинде Кыргызстандын жана Тажикстандын чек ара ведомстволорунун жетекчилери жана ички иштер министрлери жолугушту. Сүйлөшүүлөрдүн алкагында эки өлкөнүн укук коргоо органдары тартипти камсыздап, ар ким өзүнүн аймагында калк жыш жайгашкан аймактарды күзөткө алууну макулдашышты.

Ал эми Кыргызстандын жана Тажикстандын чек арачылары мамлекеттик чек арадагы чыр чыккан аймакта биргеликте күзөт жүргүзүшөт.

Исфара—Ворух жана Исфана—Баткен жолдорундагы кыймыл токтотулду.

Буга чейин Turmush басылмасы Баткен районунун Ак-Сай айылындагы кыргыз-тажик чек арасындагы чыр-чатак боюнча тергөө тобу түзүлгөнүн жазган.

Окуя тууралуу:

22-июлда саат 17:00 чамасында Баткен районунун Ак-Сай айылындагы кыргыз-тажик чек арасында чыр чыкканы маалым болгон.

Маалыматка караганда, Ак-Сай–Ворух жолундагы Төрт-Көчө тилкесине тажик тарап өлкө президенти келет деп даярдык көрүп жатышкан. Саат 17:20 чамасында тажик тарап шарттуу чек арадан 1 метр аралыкта желек орнотушкан. Кыргыз тарап нааразычылыгын билдиргенде тажик жарандары желекти 2 метрге өздөрү тарапка жылдырышкан.

Кыргыз тарап Эски-Тумба тилкесине (Дача аймагындагы) эски Ак-Сай деген жазууну орнотушканда тажик тарап аны сындырып салышкан. Бул окуялардан кийин саат 17:50 чамасында эки тарап уруша кетип, бири-бирине таш ыргытып башташкан.

Жаңжалга болжол менен кыргыз тараптан 40ка жакын киши, тажик тараптан 50гө жакын адам катышкан.

Алдын ала маалыматтарга караганда, аталган окуядан кийин Баткен облустук ооруканасына 8 адам жеткирилди. Алардын ичинен үчөө айылдыктар болсо, калганы милициянын, чек ара кызматынын өкүлдөрү.

Ал эми Мамлекеттик чек ара кызматынын маалыматына караганда, чыр-чатак учурунда курал колдонулган. Жаңжал саат 17:20 чамасында башталган. Ак-Сайдын тургундары Тажикстандын Ворух айылынын тургундарынын айылдын кире беришине желек орнотушуна каршы болушкан. Анын айынан чыр чыккан. Анын жүрүшүндө чатактын катышуучуларынын бири курал колдонгон. Ок аңчылык куралдан жөнөкөй адамдар тарабынан атылган.

Алдын ала маалыматтарга караганда, 5 адам жаракат алган. Исфара–Ворух унаа жолу жабылган. Кыргыз чек арачылары тажик тараптын чек арачылары менен биргеликте абалды жөнгө салууга аракет көрүшкөн.

Андан кийин кечинде Баткен районунун Ак-Сай айылынын тургундары кыргыз-тажик чек арасындагы чатактан улам Баткен шаарына жеткирилип жатканы кабарланган.

Маалыматка караганда, 5 кичи автобус менен адамдар алынып келген. Дагы 7-8 кичи автобус адамдарды ташып келери айтылып жаткан. Ак-сайлыктарды №57 лицейдин имаратына жайгаштырып жатышкан.

23-июлда эртең менен Ак-Сай айылынан Баткен шаарына 300дөн ашык адам көчүрүлүп келгени айтылган. Алар түнү менен № 57 лицейге, №3 мектепке жана В.Ленин орто мектебине жайгаштырылган. Тиешелүү иштерди жүргүзүү үчүн атайын штаб түзүлгөн.

23-июлда вице-премьер-министр Жеңиш Разаков менен ички иштер министри Кашкар Жунушалиев Баткен районунун Ак-Сай айылындагы чек арадан чыккан чырдан жабыркагандардан кабар алган.

Маалым болгондой, алар Баткен биргелешкен ооруканасынын сыныктар бөлүмүндө жана хирургия бөлүмүндө жаткан адамдардын ден соолуктарын сурап, кандай кошумча медициналык жардам керек болсо бериле тургандыгын айтышты. Жаракат алгандардын арасында кызматтык милдеттерин аткаруу учурунда таш тийип, ошондой эле ок тийип жаракат алган милиция кызматкерлери да бар.

Кечээ, 23-июлда саат 13:25 чамасында Тажикстандык укук коргоо органдары тарабынан Баткен—Самаркандек—Лейлек жолу жабылгандыгы кабарланган.

Маалыматка караганда, учурда аталган жолдо каттам токтоп турат. Жол саат 13:25 чамасында жабылган. Бул тилке тактала элек аймактардын катарына кирет. Жолдун жабылышынын себеби белгисиз.

Кечээ, 23-июлда саат 14:15 чамасында Баткен районунун Ак-Сай айылында тажик тараптан 2-3 жолу ок атылганы кабарланган.

Маалыматка караганда, октор КРнын ички иштер министри Кашкар Жунушалиев, Чек ара кызматынын жетекчиси Уларбек Шаршеев жана облус башчысы Акрам Мадумаровдун эл менен жолугушуусу учурунда атылган.

Алдын ала маалыматтарга караганда, бир ок чек ара кызматкеринин бутуна тийген.

23-июлда саат 17:00го карата Баткен—Лейлек жолунда унаалар топтолуп жатканы айтылган.

Маалым болгондой, бүгүн саат 17:00гө карата Тажикстандын аскерлери жолду жапкан. Ага байланыштуу Баткен районунун Көк-Таш айылында ондогон унаалар токтоп турат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×