Бөлүмдөр
Дүйшөмбү, 19-август
Баткен облусуКадамжай району 19.06.2019 13:23

Айыл турмушу: Кадамжайда малина өстүргөн дыйкандар 300 миң сомго чейин пайда табышат (сүрөт)

Turmush -  Кадамжай районундагы дыйкандар малинанын биринчи түшүмүн терип, жеринен соода кылышууда. Бул тууралуу Turmush басылмасынын аймактык кабарчысы маалымдады.

Райондогу дыйкандар жок дегенде 10 сотых аянтка малина өстүрүп, 150 миң сомдой киреше табышат.

«50 сотых багыбыз бар эле. Бакты азыр малинага алмаштырдык. 5 жылдан бери бак менен кошо малинаны да колго алып, киреше таап жатабыз. Түйшүгү да бар. Жылына 2 жолу түбүн жумшартып, убагында сугарабыз. Жылына 3 жолу түшүм берет. 1 сезондо 200-300 миң сомдой киреше табабыз. Чакан аянттан жакшы киреше болот. Ошондуктан айылыбызда бул тармакты колго алгандар көп», - деди Халмион айыл өкмөтүнүн тургуну Тойлу Дадаева.

Биринчи терим жеңил жана мол болгондуктан 1 кг 35 сомдон сатылууда.

«Биздин Халмион айыл өкмөтүндө 100 гектардай малина аянты бар. Акыркы 5-6 жылдан бери өстүргөндөр көбөйүүдө. Анткени аз аянтты ээлеп, бирок кирешеси жакшы. Биздеги 3 айылдын эли өстүрүшөт. 500гө жакын кожолукта бар. Дыйкандардын ар биринде жок дегенде 10 сотых малина аянты бар. Сезонунда 300 миң сомго чейин пайда табышат. Азыр биринчи терим башталды. 1 кг 35 сомдон сатылууда. Биринчи терим мол жана жеңил болгондуктан арзан. Ал эми экинчи терим 70-75 сомго чейин бааланат. Дыйкандардан жеке ишкерлер сатып алып кетишет», - деди Халмион айыл өкмөтүнүн башчысы Камалидин Бегматов.

Кадамжай району малина өстүрүү боюнча өлкөдө алдыңкы аймактардын катарына кирет. Райондогу калктын 90% жемиштин бул түрүн өстүрүп, дыйканчылык менен алектенет. Жылына 500 тоннадай түшүм жыйналат. Малинанын биринчи терими түшүмдүн 60-70% түзүп, калганы күзгү теримде жыйналат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×