Бөлүмдөр
Дүйшөмбү, 19-август
Баткен облусуКадамжай району 30.05.2019 14:33

Айыл турмушу: Кадамжайлык А.Мансуров үй-бүлөсү менен дыйканчылык кылып, азык-түлүктү дээрлик сатып албайт (сүрөт)

Turmush -  Кадамжай районунун Алга айылынын тургуну Абдумалик Мансуровдун үй-бүлөсү базардан дээрлик мөмө-жемиш жана азык-түлүк сатып алышпайт. Аймактык кабарчы дыйкандын чарбасы менен таанышып кайтты.

Анын айтымында, картошка, пияз, коон, дарбыз, лимон жана башка мөмө-жемиштерди өстүрүшөт. Жер титирөөдөн кийин жараксыз абалга келген сарайынын үстүн ачып, лимон, жашылча жана сарымсак эккен. Азыр лимондор чоңоюп, мөмө байлап калды. Аны менен катар балык чарбасын да иштетип жатат. 15 кв метр көлмө жасап, сазан балыктарды өстүрүп, балыктардын чоңдорунун салмагы 3 кг чейин жетти.

«Мен өзүм бала кезимден эле дыйканчылык менен алектенип, колхоз-совхоздордо да иштедим. Бекер отурбай жериме күнүмдүк турмуш-тиричиликке керектүү картошка, пияз, коон, дарбыз, чеснок, лимон жана башка бир топ мөмө-жемиштерди өстүрөм. Эң негизгиси дыйканчылыктын зыяны жок. Азык-түлүк жана айыл чарба продукциялары өзүбүздөн чыгып турат. Күн карамаларыбыз дагы бышайын деп калды. Ал бышса май сатып албайбыз. Балыктарым да чоңоюп калды. Чарчаганымда балыктарды карап эс алам. Үйгө коноктор келип калса да балык бышырып берип турабыз», - деди ал.

Ал эми жубайы Диларам Мансурова да жолдошунан калышпай пахта эккен.

«Мен кичинемден эле пахта терип чоңойдум. Ошондуктан кызыгып эктим. Аны терип, тазалап, жууркандарга салам. Базардан сатып албай, өзүм өстүргөн пахтаны колдонобуз», - деди ал.

Келини Зулхумар Халматова үйдө гүл өстүрүп, үй тиричилигин жүргүзүп турат.

«Кайын атам менен кайын энемдин бош отурганын көрбөйсүң. Эрте жаздан баштап кеч күзгө чейин тынбай иштешет. Базардан дээрлик эч нерсе сатып албайбыз. Короодо өскөн мөмө-жемиштерден күзүндө кыямдарды жасап, кышка камданабыз», - деди ал.

Дыйкан жубайлар 3 уул, 2 кыздын ата-энеси. Бардыгы өз алдынча үй-жайлуу.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×