Бөлүмдөр
Дүйшөмбү, 27-май
Баткен облусуБаткен району 05.04.2019 09:35 На русском

Учурунда 2000 тоннага чейин вино чыгарган Баткендеги заводду оңдоого 3 млн доллар керек (сүрөт)

Turmush -  Мындан 40 жыл мурда иштеп баштаган Баткен районунун Чоң-Талаа айылындагы вино завод учурда оңдоо иштерине муктаж. Бул тууралуу аталган ишкананын жетекчиси Ысак Касымов билдирди.

Анын айтымында, заводдун тетиктери эскирип, пландалган көлөмдөгү вино өндүрүлбөй жатат.

«Баткендин Чоң-Талаа айылындагы вино заводу мындан 40 жыл мурда иштеп баштаган. 1978-жылы ишке кирген заводдун эскилиги жетип, азыр оңдоого муктаж. Жылына өз алдыбызча оңдоп-түздөп, союздан калган жалгыз заводдун ишмердүүлүгүн улантып жатабыз. Бирок көздөлгөн өндүрүш чыкпайт. Анткени тетиктердин, жабдыктардын эскилиги жеткен. Учурунда 2000 тоннага чейин вино өндүргөн ишкана азыр жылына 800-900 тонна вино чыгарып, Казакстанга экспорттоп жатабыз. 2 жылдан бери казакстандык компаниялар менен кызматташып, иш жанданып калды. Бирок учурда оңдоого муктаж. Бизге оңдоо үчүн 3 млн АКШ доллары керектелет. Ал үчүн банктар дагы насыя берүүдөн баш тартышат. Анткени биз ичимдик чыгаруучу ишканабыз. Анан да күрөөгө коюучу техникалар да арзан бааланууда. Каржы булактарыбыз жок», - деди директор.

20 жыл мурда менчиктештирилип кеткен бул заводго союз убагында Баткен, Кадамжай жана Лейлек райондорундагы дыйкандар жүзүмүн тапшырып турушкан. Учурда жүзүм өстүргөндөр кыскарып, сырье жетишсиз болууда.

«Чоң-Талаа айылындагы 307 гектар жүзүм талаасы Кыргызстан эгемендүүлүктү алгандан бери иштетилбей калды. Анан да союз убагында 3 райондун эли жүзүм бактарын өстүрүп, заводго тапшырып, сырье жетиштүү болуп турган. Жер реформасынан кийин талаалар туура эмес бөлүнүп, жүзүм талаалары каралбай калды. Азыр көпчүлүк эл миграцияда же дагы башка тармакта иш алып барышат. Талаалар азыр кароосуз жатат. 30-40 жылдык жүзүмдөр куурап жок болду. Азыр жылына айыл өкмөттөгү 70 гектар аянттан, кооперативдерден 100 тоннага чейин түшүм алынып, винонун 2 түрү чыгып жатат. Жыл сайын июнь айынан күздүн аягына чейин кызуу иш жүрүп, 15 адам жумуш менен камсыз болот», - деди Касымов.

Учурда 3 гектарды ээлеген ишкананы оңдоп-түздөөгө 3 млн АКШ доллары керек. Ишкана 2014-жылдан бери жоопкерчилиги чектелген коом тарабынан иштетилүүдө.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×