Бөлүмдөр
Дүйшөмбү, 27-май
Баткен облусуКадамжай району 27.03.2019 15:40 На русском

Баткендеги миллионер чабан: О.Ноомановдун кол алдындагы жумушчулар айына 40 миң сомго чейин айлык алышат. Видео

Turmush -  Кадамжай районунун Үч-Коргон айыл өкмөтүнүн 41 жаштагы тургуну Олимжон Нооманов гиссар породасындагы койлорду багып, быйыл алардын саны 500гө жетти. Turmush басылмасынын аймактык кабарчысы анын чарбасы менен таанышты.

«Умид» атындагы асыл тукум мал чарбаны өздөштүргөнүбүзгө 15 жылдан ашты. Атам Закиржон Нооманов кыргыз Боркош ата менен жакын дос болчу. Ал досу «Закир, мал кыл. Мен сага 30 гиссар кой берейин» деп айтып, кой берген экен. Ошол мал көбөйсүн деп үмүт кылып, чарбанын атын «Умид» деп атаган», - деди ал.

Олимжон Ноомановдун апасы Латифа Хожиматова үйдөн эт үзүлбөй тургандыгын кошумчалады.

«Жолдошум 2018-жылдын ноябрь айында каза болду. Мал чарбасын ошол киши досунан 30 кой алып түптөгөн эле. Кудайга шүгүр, мал көбөйүп калды. Мен 2 келиним менен үйдө эле үй иштерин кылып отурабыз. Бизде эт үзүлбөйт. Түгөнсө эле мал союп турабыз», - деди Латифа апа.

Койлорду 5000 сомдон 10 000 сомго чейин сатышат. Мамлекеттен 13,5 гектар жерди 5 жылга ижарага алышкан. Келечекте гиссар койлордун асылдуулугун жогорулатып, алардын санын 1000ге жеткирүүнү пландап жатышат. Гиссар койдун эти даамдуу. Төлдү жакшы берип, тубар койлор козуларын жакшы карайт. Мисалы 100 койдон жылына 100 козу алынат. Кышында койлор 34 тонна чөп керектелет. Койлор жаз алды менен ар кандай илдеттерге, ичтеги курттарга каршы эмделди. 500 баш койду дарылоо үчүн 8000 сомдун тегерегинде акча кетти.

Олимжан Ноомановдун чарбасында Абиш Темирбаев менен Сапар Колдошов 4 жылдан бери кой кайтарып иштеп жатат. Алар ар бир койду 100 сомдон кайтарышат. Тактап айтканда 1 айда орточо 35-40 миң сом айлык акы алышат. Бул мал чарба кайрымдуулук иштерди да жасап, аз камсыз үй-бүлөлөргө кой, акча берип турушат.

Олимжан Нооманов 4 кыздын атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×