Бөлүмдөр
Дүйшөмбү, 27-май
Баткен облусуБаткен району 06.03.2019 12:05

Баткендеги дыйкандар күйүүчү май 4-5 сомго кымбат сатылып жатканына нааразы (сүрөт)

Turmush -  Баткен районунда жер айдоо кызуу жүрүп жаткан учурда күйүүчү майдын кымбаттыгы дыйкандарды нааразы кылууда. Бул тууралуу Баткен райондук айыл чарба жана агрардык өнүктүрүү башкармалыгынын башчысы Абдипатта Пинназаров билдирди.

Анын айтымында, күйүүчү май башка облустарга салыштырмалуу Баткен районунда 4-5 сомго кымбат сатылууда.

«Баткен районунда 8 миң 70 гектардан ашуун айдоо жери болсо, бүгүнкү күндө анын 400 гектары айдалып бүттү. Анын 41 гектарына кылкандуу дан эгиндери айдалды. Айдоо иштери 25-февралда башталган. Баткен району боюнча 3800 гектар аянтка кылкандуу дан эгиндери айдалат. Анын 2000 гектарына буудай, калганына арпа эгилчү. Жыл сайын буудай талаасын арпа аянтына алмаштыргандар көбөйүүдө. Бул жылы айдоо аянты 120 гектарга кеңейтилип, сугат жерлерде көбүрөөк жашылча-жемиштерди жетиштирүү мерчемделүүдө. Бир эле көйгөй — күйүүчү майдын кымбаттыгы болууда. Анткени күйүүчү май 45-48 сомдон сатылып, дыйкандарга оор болуп жатат. Жогору жактагылар ушул маселени карап, жөнгө салып беришсе жакшы болот эле», - деди ал.

Үрөн фонддордун биринин мүчөсү Максатбек Өмүровдун айтымында, үрөндөр аларга бекер берилген.

«Биз быйыл 20 гектар аянтка 4 тонна арпа айдап, 10 гектарга 200 кг беде уругун себүүдөбүз. Үрөндөр улуттук кыргыз жайыт ассосиациясы тарабынан акысыз берилгендиктен бизге ыңгайлуу. Эгерде үрөндү сатып алып айдасак эмгек акталбай калат. Эгер сатып ала турган болсок экмек эмеспиз. Азыр акысыз болгондуктан, таза үрөн алуу жана тоют үчүн айдап жатабыз», - деди ал.

Бул маселе боюнча Жогорку Кеңештин вице-спикери Аида Касымалиева үн катты.

«Чечилет. Анткени ушул шаршемби күнү жазгы талаа жумуштары боюнча өкмөттүн маалыматын угабыз. Анан ошол жерде ыкчам протоколдук тапшырмаларды беребиз. Ушул маселени да өкмөт башчысына коебуз. Анткени биз протоколдук тапшырма аркылуу гана чечбиз. Жаздын ар бир күнү маанилүү», - деди депутат.

Учурда Баткен районунда күйүүчү май 48 сомго чейин сатылып жатат. Ал эми Баткен облусунун Арка зонасында күйүүчү май 40 сомдон сатылып жатканы айтылууда.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×