Бөлүмдөр
Дүйшөмбү, 27-май
Баткен облусуБаткен району 02.03.2019 16:55 Жаңыланды: 09.03.2019 15:40

Айыл турмушу: Баткендик Ж.Эшболова тиккен пардалар Тажикстан, Казакстан, Өзбекстан жана Россияга чейин сатылууда (сүрөт)

Turmush -  Баткен районунун Бужум айылынын 44 жаштагы тургуну Жанара Эшболова тиккен пардалар Тажикстан, Казакстан, Өзбекстан жана Россияга чейин сатылат. Turmush басылмасынын аймактык кабарчысы чебер айым менен таанышты.

Өзүнүн айтымында, Баткен районунун Кыштут айылынын кызы. Кийин Бужум айылына келин болуп келген. Пардаларды кардарлардын каалоосундагыдай кылып тиккендиги үчүн ушул убакка чейин эч кимден даттануу болгон эмес.

«Мен кичине кезимден эле тигүүчүлүккө кызыгып, чеберчилик менен алектенем. Негизи менин таенем да таар терме соккон жана камчы токуган. Чоң энемдин атасы зергер болгон экен. Анан апам картайганча эле айылдагы кыз-келиндерге бекер көйнөк-шымдарды тигип берип жүрчү. Ошондонбу бул өнөр менде да бар. Мен бир эле парда тигем. Кардарлар инстаграмдан, анан ар кимдин үйүнөн менин эмгегимди көрүп келишет. Кардарлар Россия, Казакстан, Өзбекстандан да чыгат», - деди ал.

Каарманыбыз буга катар эле пардалар көлөмүнө жана сапатына жараша баалана тургандыгын кошумчалады.

«Өзүмдүн кесибим медик болгонуна карабай тигүүчүлүктү аркалап жатам. Мурда үй шартында эле пардаларды тигип келсем, акыркы 4 жылдан бери Баткен шаарында чакан тигүү цехин ачып иштетип жатам. Пардалардын көлөмүнө жана кездемелерине жараша баа коём. Кездемелерди Бишкектен, Түркиядан алдырам. 300-400 сомдон 10 миң сомго чейинки пардаларды тигем. Айына орто эсеп менен 30 миң сомдой киреше табам», - деди ал.

Жанара айым 2 уул, 2 кыздын апасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×