Бөлүмдөр
Дүйшөмбү, 27-май
Баткен облусуЛейлек району 07.04.2019 10:29

Айыл турмушу: Лейлектик Раушан Салиева 40 миң сомго чейин бааланган килемдерди токуйт (сүрөт)

Turmush -  Лейлек районунун Маргун айылынын 55 жаштагы тургуну Раушан Салиева 5-классынан баштап килем токуп келет. Ал айылда дээрлик бардык кыздар килем токууну өздөштүргөнүн жана килемди даярдоо оңой эмес экенин аймактык кабарчыга айтып берди.

Раушан Салиева: «Килем согуу — энелерибизден калган өнөр. Лейлекте ар бир кыздын себине таар, кийиз, килем, араби килеми сөзсүз берилет. Булардын арасынан кийиз оңой жасалат. Аны бир күндө эле жасап бүтүрүүгө болот. Араби — килемдин жеңил токулуучу түрү. Килем боёлгон жана чыныгы деп экиге бөлүнөт. Чыныгы килемдер 40 миң сомго чейин бааланат. Аны жасоого 23 килограмм ийрилген жүн, 10 кг эшилген жип, жиптин дагы башка түрүнөн 8 кг, 2-3 миң сомдук боёк керектелет. Эң чоң килемди 15 күндө төрт чебер жасап бүтүрөбүз. Бир күндө 20-30 см килем согобуз. Койдун жүнүн жазында даярдап коебуз, жетпей калса базардан сатып алабыз. Өзүбүздүн колубуз бошобой калса айылдагы чеберлер жардам берип, аларга эмгек акы төлөп беребиз», - дейт Раушан Салиева.

Кол өнөрчү унаанын отургучтары үчүн да кичинекей килем жасап, баштыктарды токуйт.

«Бир күнү карасам баштыгым эскирип калыптыр. Таардан жасап көрдүм. Алгач көтөрүүдөн тартынып жүрдүм, бирок айылдаштарым таң калып, суктанып, сурап башташты. Учурда таардан баштык тигип, сатыкка чыгарып жатам. Ошондой эле шайыр апаларга кошулуп ырдаганга да жетишем. Кышында түн узак болгондуктан түнү да килем согобуз. Килем токуп жатып колубузду бычак кесип кеткен учурлар көп эле болгон. Улам отуруп-тура берип белибиз, бутубуз да ооруп калат», - деди чебер.

Раушан Салиеванын 3 кызы бар. Эки кызы турмушка чыкканга чейин килем токууну үйрөнүшкөн. Бирок кичүү кызы татаал жумуш экенин айтып, үйрөнбөй койгон. Алар килемдерди Тажикстандын жана Лейлектин базарларына алып чыгып сатышат. Кээде көргөзмөлөргө да алып барышат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×