Бөлүмдөр
Жекшемби, 26-май
Баткен облусу, Баткен 23.01.2019 12:16 На русском

«БатМУда коррупция күч алды»: Университеттин мугалими президентке кат жазды. Ректор айтылгандарды четке какты

Turmush -  Баткен мамлекеттик университетинин мугалими Кубанычбек Таиров өзү эмгектенген окуу жайда коррупция күч алганын, ага эртерээк чара көрүүнүн зарылдыгын айтып, өлкө башчысына кат менен кайрылды. Бул тууралуу Turmush басылмасынын аймактык кабарчысына өзү билдирди.

Анын айтымында, окуу жайда студенттердин саны жыл санап азайып жатат. Ага карабай университеттин жаңы имаратынын курулушу жүрүп жатат.

«Баткен мамлекеттик университетинин башкы корпусунда студент аз. Жыл санап азайып жатат. Анан билим сапаты начарлап кеткен. Студенттердин сабакка катышуусу, мугалимдердин билим берүүсү начар. Ага карабай 300 млн сомдук жаңы имараттын курулушун башташкан. Качан, кайсы акчага курулуп бүтө турганы ректордун өзүнө деле маалым эмес. Бул коррупцияга жол ачат. Мисалы анын мөөнөтү бүткөнчө бул имарат бүтпөйт. Анан өткөн жылы ректор Абдибап Зулпуев Францияга БатМУнун эсебинен командировкага чыгып, университеттин эсебинен сыйлык алып келди. Анын окуу жайга пайдасы деле тийген жок. А студенттерге 1 сом да командировка төлөнбөйт. Анан бизде AVN системасы жок, иштебейт. Бюджети ректордон башкага караңгы.

Өткөн жылы ректордун айдоочусу кызматтык унаада каза болду. Эч ким жоопко тартылган жок. Ректор кызматтык унаанын ээси катары жооп бериши керек эле. Жумуштан сырткары убакта айдоочусу эмне кылып жүргөн?», - деди Таиров.

Университеттин ректору Абдибап Зулпуев бул айтылгандарды четке кагып, университеттин жаңы имараты үнөмдөлгөн акчага курулуп жаткандыгын билдирди.

«Бизде эч кандай коррупция жок. Жаңы имарат биздин келечек үчүн. Билем, менин мөөнөтүм бүткөнчө бүтпөйт (имараттын курулушу). Бирок окуу жайдын үнөмдөлгөн акчасын текке кетирбей, жаңы корпус салуудабыз. Анан бизде AVN иштейт. Студенттер азайып жатат. Бул жалпы республикалык тестирлөөнүн жыйынтыгы менен байланыштуу.

Менин Францияга барганыма университеттен каралган акча болгон. Бирок сыйлыкты мен өз каражатыма сатып алдым. А менин айдоочум кызматтык унаада жумуштан сырткары убакта кырсыкка кабылып каза болду. Ал мас болгон. Мен ал күнү ооруп жаткам. Бул кудайдын жазганы, эч ким эч нерсе кыла албайт экен. Кызматтык унаа турат, аны оңдоп-түздөйбүз», - деди ректор.

Студенттер үнөмдөлгөн акчаларды окуу жайдын корпустарын оңдоого жумшаса дешет.

«Биздин Кызыл-Кыя шаарындагы институттун эскилиги жеткен. Кышкысын суук, полдору чириген. Мындай айтканда окууга ыңгайсыз. Андыктан жетекчилик оңдоп-түздөөдөн өткөрүп беришсе. Шарттын жоктугунан жыл сайын студенттер да башка жактарга которулуп кетүүдө», - деди студенттердин бири Эржан Тойчубек уулу.

Өткөн жылы аталган окуу жайды аяктаган 39 студенттин диплому жараксыз деп табылып, 7 мугалимге кылмыш иш козголгон. Бирок сот чечим чыгарган мугалимдер аталган университетте билим берүүнү улантып жатышат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×