Бөлүмдөр
Дүйшөмбү, 27-май
Баткен облусу, Кызыл-Кыя 20.01.2019 15:44

Айыл турмушу: Кызыл-кыялык устанын темирден жасалган эмгектери Москвадагы көчөлөргө коюлган (сүрөт)

Turmush -  Кызыл-Кыя шаарынын 41 жаштагы тургуну Куватбек Каразаков 20 жылдан бери темир устачылык менен алектенип келет. Ал бул өнөрдү атасынан үйрөнгөн. Ал атасы оор илдетке чалдыкканда операцияга акча таба албай, Россияга кетүүгө мажбур болгонун айтат.

Куватбек Каразаков: «Атам темирлерди ширетип иштечү. Буйрутма алып иштегени барганда мени кошо ала барчу эле. Ошентип жүрүп ширетүү иштерин үйрөнүп алдым. 20 жашымда атам менен мектептердин жылуулук түтүктөрүн жасагам. Андан кийин атам каттуу ооруп калды. Атамды дарылатып жүрдүк, аягында операция жасатууга муктаж болду. Унаамды, үйдөгү буюмдарды сатсам да, операциянын акысын төлөөгө акча жеткидей эмес. Карызга акча алганга аргасыз болдум. Апам карызыбызды төлөй албай калды. Тагдырдын буйругу менен 2002-жылы Россияга кеттим. Бирок атам операциядан кийин узак өмүр сүргөн жок. Ал кандай дартка чалдыкканын билбей көз жумду», - деди.

Куватбек мырза темир устачылыктын көп сырларын Россиядан үйрөнгөнүн жашырган жок. Анын темирден жасалган эмгектери Россиянын айрым көчөлөрүнө коюлган.

«Мен оюмдагы нерсени жасоону, эмгектеримдин автору өзүм болгонду жактырам. Мындан улам бирөөнүн жасаганына окшоштуруп жасагым келбейт. Буюмдардын 70 пайызын өзүм ойлоп табам. Кардарлардын сунушуна ылайыктап жасап берүүгө аракет кылам. 2002-жылдан бери Россиянын ар кайсы облусунда иштедим. Жергиликтүү усталардан көп нерселерди үйрөнө алдым. Иштеп жүрүп карызыбыздан да кутулдук.

Россияда иштеп жүргөндө биздин директор "бир буйрутма бар, ким жасайт?" деп сурап калды. Гүлдү дубалга илүү үчүн тирегич жасоо керек болчу. Тажрыйбалуу усталар ал буйрутмадан баш тартты. Мен кызыгып, жасай турганымды айттым. Бир күнү көчөлөрдүн биринде бара жатсам мен жасаган гүл салгыч турат. Аны көчөнүн башына коюп, гүл өстүрүшүптүр. Сүйүнгөнүмдөн барып карап көрсөм мен жасаган буюм экен. Өзүмдүн эмгегимди дароо тааныдым.

Мындан тышкары көптөгөн тосмолорду жасагам. Көчөдө бара жатып өзүм жасаган буюмдарды көрүп, суктанам. Жакында эле кайра Россияга чакыруу болду, бирок үй-бүлөлүк шартка байланыштуу бара алган жокмун. 17 жыл Россияда иштедим. Кыргызстанга келгениме эки жыл болуп калды. Буюрса темир устакана ачып, бизнес түптөөнү пландап жатам. Улуу балам менин жолумду жолдоп, темир устачылыкты жактырат. Учурда балама да устачылыктын сырларын үйрөтүп жатам», - деди ал.

Уста 4 баланын атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×