Бөлүмдөр
Бейшемби, 23-май
Баткен облусуКадамжай району 23.11.2018 15:14

Кадамжайда алманын түшүмү жакшы болгону менен баасы арзан болуп жатканы багбандарды санаркатууда (видео)

Turmush -  Быйыл Кадамжай районунун Кызыл-Булак айылында алманын түшүмү жакшы болгону менен арзан бааланып жаткандыгы багбандарды санаркатууда.

Кызыл-Булак айылынын тургуну Лутфилла Мустафакуловдун айтымында, багбандарга мамлекет тарабынан колдоо керек.

«Алманын түшүмү жакшы, бирок баасы арзан болууда. Багбандарга мамлекет тарабынан жардам болсо биз кыйналып базарга барып сатпайт элек. Көйгөй бир эле алма маселеси эмес. Жазында гилас, шабдалы жана малиналарыбызды өзүбүз сатабыз. Кыргызстандын мөмө-жемиштерин чет мамлекетке экспорттоого шарт түзүлсө дыйкан, багбандардын мээнети акталат беле», - деди ал.

Бектемир Махамаджан уулу жылына алма багынан 12 тоннага чейин түшүм алат. Багбандар багынан жаз мезгилинен күзгө чейин көзүн алышпайт. Алар эрте жазда бактын түбүн жумшартып, койдун кыгын жана жер семирткичтерди салышат. Куртка каршы 9 ай ичинде бакты 5-6 жолу дарылоо да зарыл.

«Алма бакты канчалык жакшы карасаң сага ошончолук көп түшүм берет. Алмалардын эң өтүмдүүсү болгон жанат, победа, беш жылдыз, симиренко, байко деген түрлөрүн өстүрөбүз. Алардын ичинен жазга чейин сактап, саткан алмабыз байко алмасы. Аны күзүндө тоң (толук быша элек) кезинде эле үзүп алабыз. Ал жазга чейин бышып, даамына келгенде эң кымбат сатылат», - деди Бектемир мырза.

Ал эми Кадамжай районунун агрардык өнүктүрүү башкармалыгынын башчысы Айдарали Асамидинов билдиргендей, быйылкы жылы алманын түшүмү былтыркыга салыштырмалуу түшүмдүү жана баасы арзан.

«Кадамжайда алманын 22 түрү өсөт. Быйыл өткөн жылга салыштырмалуу түшүмдүү болду. Райондо былтыр алманын 1 кг дүң баада 20 сомдон 45-50 сомго чейин сатылса, быйыл 7 сомдон 30 сомго чейин бааланып жатат. Кадамжай районунда жылына 25 тоннадан 30 миң тоннага чейин түшүм жыйнап алышат. Эми тиешелүү кызматтагылар менен сүйлөшүүлөр жүрүп жатат. Ошонун негизинде Кадамжайдын алмасы менен картошка, пияз жана жашылчаларды чектеш жайгашкан Тажикстан, Казакстан жана Россияга экспорттойбуз деген ойдобуз. Мисалы мына быйыл Өзбекстан чек арасы ачылып, Сох жана Шахмардан чек араларынан биздин мөмө-жемиштерибиз өтүп жатты», - деди Асамидинов.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×