Бөлүмдөр
Бейшемби, 13-декабрь
Баткен облусу, Исфана 22.09.2018 12:34

Исфанадагы депуттар мэрди шайлоо таза өтпөгөнүн айтып, БШКга кат жолдошту

Turmush -  Исфана шаардык кеңешинин депутаттары 18-сентябрдагы шаар мэрин шайлоо таза өтпөгөнүн айтып, Борбордук шайлоо комиссиясына кат жолдошту.

Алардын айтымында, мэрлик кызматка Абдували Хамраев менен Акжол Касымов талапкерлигин койгон. Шайлоого жалпы 30 депутат катышып, Абдували Хамраев 16 добушка, Акжол Касымов 14 добушка ээ болгон. Бирок шайлоонун жүрүшүндө 7 бюллетендин артына сандык белгилер коюлгандыгы байкалган. Мындан улам жергиликтүү кеңештин 16 депутаты, аймактык шайлоо комиссиясынын чечимине макул болбой, Борбордук шайлоо комиссиясына кат жолдоду. Алар белгиси бар бюллетендер жараксыз деп табылбай калганына, шайлоо таза өтпөгөнүнө нааразы.

«Бизге шайлоо башталганга чейин шайлоо комиссиясы бюллетендер таза бойдон болушу керектигин айтышкан. Бирок шайлоо бүткөндө эң көп добушка ээ болгон Абдували Хамраевге берилген 16 бюллетендин ичинен 7 бюллетенде номур коюлганы байкалды. Буга чейин дагы биз депутаттарга сырттан кысым болуп жатканын укканбыз. Биз бюллетендерге номур коюлганы коррупциялык элементтердин бири деп ойлойбуз. Шайлоонун жыйынтыгында шайлоо мыйзамсыз өттү деп белгилегенбиз», - деди депутаттар.

Ал эми Лейлек району боюнча аймактык шайлоо комиссиясынын төрагасы Алмаз Рахмановдун айтымында, шайлоо таза өткөн. Айрым бюллетендердин артында чекит бар экендиги байкалган.

«Шайлоо борбордук шайлоо комиссиясынын жобосу менен таза өттү. 7 бюллетендин артында чекит бар экендигин көрдүк. Бюллетендердин жараксыздыгын колго салганбыз. Натыйжада комиссия мүчөлөрү жарактуу деп таап берген. Анткени ал чекиттер бюллетендин артына коюлган. Бюллетендин бетиндеги бир гана чакмак белгиленген. Шайлоо мыйзам чегинде таза өткөн. Эми талапкерлердин кимиси шайланганын борбордук шайлоо комиссиясын аныктайт. Азырынча шаар мэри ким болгондугу маалым эмес. Нааразы болгон депуттар БШКга кайрылган», - деди ал.

Окуя тууралуу:

Буга чейин 18-сентябрда Лейлек районунун акимчилигинен Исфана шаарынын мэри болуп 60 жаштагы Абдивали Хамраев шайлангандыгын кабарлашкан.

Маалым болгондой, мэрлик кызматка КСДП партиясынан Абдивали Хамраев менен «Республика» партиясынан Акжол Касымов ат салышкан. Добуш берүүнүн жыйынтыгында Абдивали Хамраев 16 добушка ээ болсо, Акжол Касымов 14 добуш алган.

Абдивали Хамраев мындан мурда Лейлек районунда акимдин орун басары болуп иштеген. Мамлекеттик кызматтарда 34 жылдан бери иштеп келет. Акыркы учурда Лейлек райондук айыл чарба департаментинин башчысы болуп эмгектенип келген.

Исфана шаарынын буга чейинки мэри Абдулмухтар Анарботоев 24-август күнү өз арызы менен иштен кеткен болчу.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×