Бөлүмдөр
Шаршемби, 14-ноябрь
Баткен облусу 29.01.2018 11:24 На русском

Фото — Баткенде 4 ай мурда курулушу бүткөн мектеп колдонууга берилбей жатат

Turmush -  Баткен районунун Кара-Булак айылында курулушу 4 ай мурда аяктаган мектеп колдонууга берилбей турат. Бул тууралуу жергиликтүү тургундар билдиришти.

Маалыматка караганда, 375 орундуу мектептин курулушу 2014-жылы башталып, өткөн жылы толук аяктаган. Андан бери 4 ай өтсө да колдонууга берилбей, тургундардын нааразычылыгын жаратууда. Учурда окуучулар 1978-жылы курулган эски мектепте окуп жатышат.

«Курулуш бүтүп даяр турат. Бирок окуучулар дагы деле эски мектепте окуп жатышат. Көмүр жагылган 3 кабаттуу мектеп окуучусу жок турат. Октябрь айында ачылышы болот деп айтылган. Ачылышы болбоду, январда дешти, анда да ачылбады», - деди айыл тургуну Абдиллаким Абдураимов.

Мектеп директору Таалай Эрматовдун айтымында, мектепти президенттик шайлоонун алдында ачмак болушкан.

«С.Эрматов атындагы орто мектеби 1978-жылы курулган. Мектеп эски болгондуктан бир имараты жарактан чыккан. Ага окуучулар батпай, 3 кабаттан турган 375 орундуу мектептин курулушу 2014-жылы башталган. Өткөн жылдын октябрь айында толук курулушу аяктап, колдонууга даяр болду. Президенттик шайлоонун алдында президент келип ачып бермек болгон. Бирок ачылышы болбой калды, эми ачылат. Мектеп толугу менен даяр», - деди Эрматов.

Кара-Булак айылында бул мектептен сырткары дагы бир мектеп бар. Айылда жалпы 500дөн ашуун окуучу билим алат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×