Бөлүмдөр
Жума, 19-октябрь
Баткен облусуЛейлек району 24.10.2017 15:20

Андарактагы тажик тилдүү мектепте китептер жетишсиз

Turmush -  Лейлек районунун Андарак айылындагы тажик тилдүү мектепте китептин жетишсиздиги билим берүүгө кедергисин тийгизип жаткандыгын мугалимдер билдиришти.

Алардын айтымында, мектепте 1200 окуучу билим алат. Сабактар тажик тилинде окутулгандыктан 10-11-класстар үчүн китеп маселеси курч. Мындай абал эгемендүүлүк жылдардан бери эле сакталып келет. Ошол себептен бул мектептен бүткөн окуучулардын айрымдары гана жогорку билимдүү болушса, калганы окуусун уланта албай, мигранттардын же жумушсуз жаштардын санын толуктайт.

Мектептин биология сабагы боюнча мугалими Орозбай Рахимов акыркы жылдары 9-класска чейинкилер үчүн биология китептери тажик тилинде чыгарылганы менен 10-11-класстар үчүн ушул кезге чейин китеп жоктугун айтат. Мындан улам кыргыз тилдүү мектептерден китеп алып келип, аны тажик тилине которууга аргасыз болушат.

Мектеп директорунун орун басары Сухробжон Эргешов билдиргендей, китептин жетишсиздиги окуучулардын жалпы мамлекеттик тестирлөөдөн төмөн упай алуусунун себеби болууда. Анын пикиринде, китеп менен камсыздай албаган соң жогорку окуу жайга өткөн окуучулар үчүн жеңилдиктерди берүү зарыл. Анткени мектеп тажик тилдүү болгондуктан окуучу жакшы окуса да орусча жана кыргызча тесттен төмөн баа алып калышы ыктымал.

Баткен облусунун жетекчилигинин маалыматына караганда, облус боюнча 230 мектеп болсо, анын ичинен 13 мектеп өзбек тилдүү. 2 мектепте тажик тилинде билим берилет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×