Бөлүмдөр
Шаршемби, 13-декабрь
69.75    82.26    1.18    KZT 0.21
Баткен

Кызыл-Кыядагы мектеп-интернат 1-класска окуучуларды кабыл албай жатат, - ата-энелер

Turmush -  Кызыл-Кыя шаарындагы И.Абдырахманов атындагы мектеп-интернат 1-класска окуучуларды кабыл албай жатат. Бул тууралуу аймактык кабарчыга жергиликтүү тургундар билдиришти.

Алардын айтымында, 2008-жылы Кыргызстандагы интернаттардын санын кыскартуу максатында аларды жоюу жөнүндө токтом чыккан. Токтомдун негизинде аталган мектеп-интернат окуучуларды кабыл албай койгон. Бирок мындай чечимге эл 2008-жылдан бери каршылыктарын айтып келет. Анткени мектеп жыл сайын 1-класстарды өз убагында кабыл албай коет. Былтыркы окуу жылында да 1-класстарды ноябрь айында кабыл алышкан. Бирок быйыл ал окуучулар 2-класс болгону менен аларга интернат окуучусу деген чечим чыга элек жана жаңыдан окууга келген 1-класстар дагы кабыл алынбай жатат. Эл аталган токтом жокко чыгарылып, интернат окуучуларды өз убагында кабыл алышын талап кылышат.

Шаар тургуну Айназик Токтобек кызы 3 баласын жана абысынын 2 баласын карайт.

«2012-жылы абысыным 2 баласын мага таштап кеткен бойдон жок, кабар албайт. Анын балдарынын бири 3-класска, дагы бири 1-класска барышы керек. Бирок мен аларды жатак мектепке берейин десем кабыл алышпайт. №4 мектепке алып барсам аларда да орун жок. Бизге интернаттын иштөөсү зарыл», - деди ал.

(Айназик Токтобек кызы)

2

Интернаттагы балдардын көпчүлүгү туугандарынын үйүндө турушкандыктан, аларга жатак мектеп зарыл. Бирок кээ бир «чоңдордун» кызыкчылыгы үчүн бул жер жөн эле жабылып жатат. Эгер бул жер жабылса анда «чоңдор» имаратты коммерциялык бала бакчага айлантышат, дешет тургундар.

Маселе боюнча окуучулардын ата-энелери Жогорку Кеңештин депутаты Жанар Акаедин катышуусунда жыйын өткөрүштү. Ж.Акаев маселени угуп, көйгөйдү парламентке жеткире тургандыгын билдирди.

«Өнүккөн өлкөлөрдө окуучуларды атайын автобустар үйүнө барып алып келишет. Бизде жүздөгөн балдарды билимсиз калтыруу – адилетсиздик. Токтомдор элдин муктаждыгына карап иштеши керек. Эгер элге бул нерсе керек болсо, анда бул токтом жокко чыгарылыш керек», - деди депутат.

Жатак интернатта учурда 223 окуучу бар. Анын ичинен 186 окуучу интернатта окушса, 55 окуучу интернатта жатып, бирок шаардагы №4 мектепке барып окушат. Жатып окуган 186 окуучунун ичинен сегизи көп балалуулардын балдары. 80 окуучу аз камсыз болгон үй-бүлөлөрдүн балдары. Бирөө асырап алынган, бешөө жалгыз бой энелердин балдары, экөө тоголок жетим, 33 бала жарым жетим, 46 баланын ата-энеси ажырашкандар, жана 10 бала турмуш шарты өтө оор үй-бүлөлөрдүн балдары.

Интернатта жатып, №4 мектепке каттап окуган 55 окуучунун ичинен 4 бала көп балалуулардын балдары. 29 бала аз камсыз болгондор, экөө асырап алынган, бешөө жалгыз бой энелердин балдары, бешөө жарым жетим, жана 10 баланын ата-энеси ажырашкан. Жатак-мектепте 2-5-6-7-8-класстар гана бар. 3-4-класстын окуучулары №4 мектепке барып окушат.

«№4 мектепте да орундар жетишсиздигинен интернаттан барган 4-класстардын 55 окуучусу бир класста батпаса да окушат. Мектеп интернатта орундар кеңири болгону менен окуучуларын башка мектепте окутушат. Мунун максаты – окуучулардын санын азайтып, интернатты жабуу керек дегенди билдирет», - деди окуучулардын биринин апасы Сайрагүл Жумабаева.

(Сайрагүл Жумабаева)

4

Кызыл-Кыя шаардык билим берүү бөлүмүнүн башчысы Дамира Мотосмонованын айтымында, 2013-жылы КРнын интернат тибиндеги балдар мекемелерин башкарууну каржылоону оптималдаштыруу планын иштеп чыгып, бекитүү – социалдык коргоо жана мамлекеттик финансыларды башкаруу тармагындагы сектордук саясатты колдоо программасынын талаптарынын бири болгон. Ар бир бала үй-бүлөдө тарбия алышына жетишүү максатында Кызыл-Кыя мектеп-интернатын оптималдаштыруу планын киргизүү чечими кабыл алынган. 2012-жылы аталган мектеп-интернат КРнын Билим берүү жана илим министрлигинин балансына өткөрүлүп, учурда ар түрдүү категориядагы балдар тарбияланып келет.

(Дамира Мотосмонова)

3

«Мектептердин оптималдаштыруу планына киргизилгени да бир тарабынан жакшы. Мунун максаты – бала ата-эне мээримине бөлөнүп тарбиялансын жана жакшы инсан болуп чыксын дегендик. Эгер балдарды карап бергенге мүмкүнчүлүгү бар ата-энелер болсо анда интернаттагы балдарды карамагына алып карап беришсе, аларга өкмөт тарабынан акча төлөнүп берилет деген дагы жакшы максат бар. Бул реформа сыяктуу өзгөртүүнү киргизүү балким бара-бара туура жана жакшы чечим болуп чыгат. Биз муну ата-энелерге түшүндүрүп эле жатабыз, бирок ар кандай ата-энелер бар экен», - деди Д.Мотосмонова.

Ал эми, шаардын вице-мэри Асылбек Маткалыковдун айтымында, эгер жатак мектеп-интернат токтомдун негизинде жабыла турган болсо, анда бул имарат билим берүү мекемеси бойдон калат. Балким гимназияга айланат. Эл оозунда айтылып жүргөн коммерциялык бала бакчага эч качан айланбайт.

(Вице-мэр Асылбек Маткалыков)

1

«Министрликтердин буйругу менен 1-класска кабыл алса болот. Акча маселеси да жогорку жактан чечилет. Мында жергиликтүү бийликтин, билим берүү бөлүмүнүн эч кандай тиешеси жок. Бирок шаар чынында эле мектеп-интернатка муктаж. Бул оптимизация планы 2018-жылы дагы каралат делген», - деди вице-мэр.

Аталган мектеп-интернатка Ош жана Баткен облустарынан балдар келип окушат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 2191
Комментарии
Обсуждения закрыты
Көп окулду
Учурда окулуп жатат
×