Бөлүмдөр
Жума, 20-апрель
Баткен

Элдик уламыштар: Ат жайлоосу деген түшүнүктү берген Баткендин Исфана шаары (фото)

Turmush -  Баткен облусунун Лейлек районунун борбору Исфана шаары калк жыш жайгашкан аймактардын катарына кирет. Бүгүнкү күндө аталган шаарда 19 миңге жакын адам жашап, өнүгүп келе жаткан калаалардын бири.

Исфана шаары Фергана өрөөнүнүн аймагында жайгашып, үч тарабынан тең Тажикстан менен чектешет. Райондун борбору катары эсептелгендиктен карамагында Мурза-Патча, Чимген, Самат, Тайлан, Ак-Булак жана Голбо айылдары бар.

Аталган айылдардын тургундарын кошуп эсептегенде Исфана шаарынын аймагында 30 миңге жакын адам жашайт. Алардын арасында кыргыз, өзбек, тажик жана башка улуттардын өкүлдөрү бар.

Эл оозунда айтылган уламыштарга караганда, Исфана деген сөз фарс тилинин «аспана кент» деген сөзүнөн алынып, «ат жайлоосу» деген түшүнүктү берет.

Тарыхтагы маалыматтарда белгиленгендей, аталган шаар 9-10-кылымдын башында түптөлүп, дыйканчылык менен алектенген эл жашаган. Болжол менен 16-кылымдан тарта эл жыш отурукташа баштаган.

Ал эми азыркы көрүнүшкө келүүсү СССР мезгилинде башталган. 2001-жылы мурунку президент Аскар Акаевдин буйругу менен Исфана шаарына шаар деген макам берилип, ошондон тарта Лейлек районунун борбору болгон.

Азыркы тапта Исфана шаарында бир нече орто мектеп, кесиптик лицейлер, мечиттер, медресе, музей комплекси, бала бакча ана жогорку окуу жайлардын филиалдары жайгашкан. Мындан тышкары Лейлек районунун ооруканасы орун алып, район аймагындагы бейтаптар дарыланышат.

Исфана шаарынын климаты жайы өтө ысык болсо, кыш мезгили узак жана суук болот.

Жергиликтүү тургундардын көпчүлүгү Орусияга иштөөгө кетсе, калгандары мал жана айыл чарбачылыгы, соода иштери менен алектенет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 11291
Көп окулду
Элдик уламыштар
Учурда окулуп жатат
8:19,   20.04.2018   ( 7 адам окуп жатат)
×